Geus paheut ti kamari kénéh, poé Saptu (9/1) téh rék aya riungan jeung papada sobat LISES Unpad nu kungsi aktif di awal taun 90-an. Tempatna di Kopi Progo di Jalan Progo, pabeubeurang wanci haneut sayur. Iber mimiti mah katampa ti lanceuk angkatan, Téh Nita Hérjantini (Angkatan 88, Lingga Buana) ngaliwatan fb. Ti dinya terus ditépakeun deui sina naréptépan ka nu séjén.Niat indit ti imah téh ti tabuh 11 kénéh. Tapi kakara bisa jung bada lohor. Basa rék indit pisan, Soléh Hadistisna (Angkatan 89, Niskalawastu) nelepon, mapaykeun rék indit henteuna.

“Kakara rék jung,” témbal téh, “Tepung di ditu wé.”
Dasar jodo –tina katuliskeun kuntilanak, barang tepi ka tempat parkir, ku diparengkeun pisan tepung jeung Soléh. Ngaboncéng geureuhana. Ti mimiti nempo ka kuring gé, Soléh téh geus nyéréngéh. Sukur, asa aya batur yeuh. Basa sup ka jero, horéng di dinya geus aya genep urangna, Kang Ajat (88), Téh Nita (88), Rédi Langentresna (92), Agam Rizki Monzana (89), Ira Garmanah (93), jeung Maya Sofiana (92). Mani pogot sasalaman, dipapay hiji-hiji. Bagja, bisa ngariung jeung sobat sapapanggungan nu geus lila teu manggih deui panggung.

Teu kungsi lila torojol Téh Béy (Nurkholbiah, angkatan 89) kapandeurian. Pada ngarangkulan (ku kaomna), pada ngabagéakeun.
Kalah uplek ngobrol ngalér-ngidul. Sagala diobrolkeun. Sagala dibudalkeun. Paagul-agul pédah kungsi ditolak (lebah dieu mah kuring teu pipilueun agul, najan enya karaos nineungna geuning ditolak téh hé-hé….). Siliseungseurikeun, silibolékérkeun pangalaman ‘ditampik’. Agul duméh kungsi ditolak 12 kali. Agul duméh ditinggalkeun kawin. Agul pédah pada-pada micinta mojang nu sarua. bedah, taya nu didingding kelir. Ukur Néng Maya nu teu pati agul ku pangalamanana téh. Tuda ti kapungkur gé, tétéh éta mah terkenal carang takolna, iwal ti gumujeng sareng gumujeng baé bari ngabandungan wangkongan nu ‘arocés’.

Tina riungan téh nguniang kasapukan, rék milu rumojong kana gagasan Réuni Akbar LISES Unpad nu pajah rék diayakeun bulan Fébruari ayeuna. Saréréa pada sapuk, rék silibéjaan, sangkan dina emprona bisa rempeg ngahadiran. Lian ti ngabadamikeun pangrojong kana acara réuni téa, dina éta riungan gé saréréa pada misapuk rék nyieun beungkeutan ‘non formal’ di papada alumni. Tapi saréréa gé sapuk, najan enya non formal, keukeuh baé kudu aya nu ngoordinasikeunana. Ku kitu téh diwangun baé struktur ‘kapangurusanana’ sakumaha nu kabaca di handap ieu.

Ketua: Kang Ajat
Sekretaris: Nita Hérjantini, Evi Pramanik
Bendahara: Nurkholbiah
Humas: Dian Héndrayana, Agam Rizki, Ricky Nugaraha
Konsumsi: Nurmaya Sofiana, Ira Garmanah, Rosmawati
Acara: Rédi LT, Soléh, Nantia Réna Munggaran
Eta susunan kapangurusan gedé kamunginan bisa diwewegan deui ka hareupna. Sing saha baé bisa icikibung.
Geus kasusun kapangurusan kitu mah, riungan téh ditutup kira tabuh 16.30. Mun taya harungan, baris ngariung deui tanggal 24 Januari. Rencanana dii Perpustakaan Unpad (cara riungan sabada lebaran téa), tabuh 10-an.
Utamana ka sing saha waé nu rumaos anggota LISES ti saban entragan mangga urang ngairung kaping 24 Januari. Wartosan deui nu sanésna. Kahadé lali, sasih Fébruari badé aya Réuni Akbar LISES. Urang deudeul ku sadayana. Prung ah!

Sakitu heula
HUMAS